ინფრასტრუქტურის მინისტრი წალენჯიხის №1 საჯარო სკოლის პედაგოგებსა და მოსწავლეთა მშობლებს შეხვდა
7 ივლისი 2026ინფრასტრუქტურის მინისტრი რევაზ სოხაძე, საქართველოს პარლამენტის წევრებთან - ირაკლი ზარქუასთან და ილია ინჯიასთან, მუნიციპალური განვითარების ფონდის აღმასრულებელ დირექტორ გიორგი შონიასთან და ადგილობრივი ხელისუფლების წარმომადგენლებთან ერთად, წალენჯიხის №1 საჯარო სკოლის პედაგოგებსა და მოსწავლეთა მშობლებს შეხვდა. შეხვედრაზე მინისტრმა ახალი სკოლის მშენებლობისთვის მიმდინარე მოსამზადებელი პროცესი და პროექტირების ეტაპი წარადგინა, ასევე მუნიციპალიტეტში მიმდინარე და დაგეგმილ საგანმანათლებლო, სპორტულ და სხვა საჯარო ინფრასტრუქტურულ პროექტებზე ისაუბრა.
რევაზ სოხაძემ აღნიშნა, რომ ქალაქ წალენჯიხის №1 საჯარო სკოლისთვის 600 მოსწავლეზე გათვლილი თანამედროვე სასწავლო სივრცის პროექტირება მიმდინარეობს. მისი თქმით, ახალი სკოლა სრულად იქნება მორგებული თანამედროვე საგანმანათლებლო სტანდარტებს და მოსწავლეებსა და პედაგოგებს უსაფრთხო, კომფორტულ და სრულფასოვან გარემოს შესთავაზებს.
შეხვედრაზე აღინიშნა, რომ ამ ეტაპზე დასრულებულია სკოლის ესკიზური პროექტი, რომელიც შეთანხმებულია საქართველოს განათლების, მეცნიერებისა და ახალგაზრდობის სამინისტროსთან. ასევე ჩაბარებულია პროექტირების პირველი ეტაპით გათვალისწინებული დოკუმენტაცია, ხოლო ამჟამად მიმდინარეობს მეორე ეტაპის საპროექტო დოკუმენტაციის მომზადება.
მინისტრმა დამსწრეებს ასევე გააცნო მუნიციპალიტეტში მიმდინარე საგანმანათლებლო პროექტების პროგრესი, მათ შორის სოფელ ფახულანის თემის №2 საჯარო სკოლის მშენებლობა და სოფელ საჩინოს თემის №1 საჯარო სკოლის დასრულებული პროექტი. შეხვედრაზე საუბარი შეეხო მუნიციპალიტეტში დაგეგმილ სპორტულ და სხვა საჯარო ინფრასტრუქტურულ პროექტებსაც, რომლებიც ადგილობრივი მოსახლეობის ცხოვრების ხარისხის გაუმჯობესებასა და მუნიციპალიტეტის განვითარებას შეუწყობს ხელს.
წალენჯიხის №1 საჯარო სკოლის პროექტირება საქართველოს მთავრობის დაფინანსებით ხორციელდება.
